Madeira policromada
Ca. 1938
85x130x5
Colección particular
Óvalo marcadamente pronunciado concibido para decorar un cabezal de cama.
Trátase dun baixorrelevo de madeira lixeiramente policromada sen estucar en que se representa a sacra familia, que ocupa practicamente todo o espazo. O Neno ocupa o centro da escena, na que aparece interactuando cos seus proxenitores, efecto que consegue coa colocación das súas mans. É unha escena dinámica que lembra os modelos renacentistas. San Xosé e mais a Virxe mostran o seu fillo, orgullosos, ao que lle deixan todo o protagonismo. Son figuras novas. A Virxe é case unha nena e segue o modelo de Asorey; é dicir, é loura, de ollos azuis e ten as fazulas rosadas e o pelo louro. Viste unha roupaxe avermellada e unha capa esbrancuxada de marcados pregues e está toucada cunha aureola. San Xosé sostén a man do Neno e móstranolo orgulloso. E para lle dar maior protagonismo e movemento á escena, apártase del lixeiramente. Viste unha roupaxe en diferentes tons de azul e unha capa amarela. Aos lados, para encher o espazo, aparecen dous vasos con flores, rosas no caso da Virxe e lirios no de San Xosé.